జీసీసీ బ్రాండ్ ఉత్పత్తులు నాణ్యతకు ప్రామాణికం : డిప్యూటీ సీఎం

జీసీసీ తేనె, కాఫీ వంటి ఉత్పత్తులు దేశంలోని పలు ప్రాంతాల్లో ప్రాచుర్యం పొందాయని, ఆన్లైన్ అమ్మకాలను ప్రోత్సహించడం ద్వారా కార్పొరేషన్ ప్రతిష్ఠను మరింత పెంచాలన్న ... రాజన్న దొర 

మీడియా పవర్, విశాఖపట్నం:  గిరిజనుల అభ్యున్నతికి, దళారుల దోపిడీని అరికట్టేందుకు 1956లో ఏర్పాటు చేసిన గిరిజన సహకార సంస్థ (జీసీసీ) ఉన్నత ప్రమాణాలకు పర్యాయపదంగా మారిందని ఉప ముఖ్యమంత్రి, గిరిజన సంక్షేమ శాఖ మంత్రి పీడిక రాజన్న దొర అన్నారు. జీసీసీ ఆధ్వర్యంలో నూతన ఉత్పత్తుల ఆవిష్కరణ, జీసీసీ ఉద్యోగులకు హెల్త్ కార్డుల పంపిణీ కార్యక్రమానికి రాజన్న దొర ముఖ్య అతిథిగా హాజరయ్యారు.  గురువారం ఆయన కార్పొరేషన్ కార్యకలాపాలపై సమీక్ష నిర్వహించారు. 

    ఈ కార్యక్రమంలో పాల్గొన్న ఉద్యోగులు, అధికారులను ఉద్దేశించి ప్రసంగించిన గిరిజన సంక్షేమ శాఖ మంత్రి జీసీసీతో తనకున్న అనుబంధాన్ని వివరించారు.  'నేను మీ జీసీసీ కుటుంబ సభ్యుడిని అని గుర్తుచేశారు.  గిరిజన ప్రాంతం నుంచి వచ్చిన నేను రాజకీయాల్లోకి రాకముందు జీసీసీలో పనిచేశానని అన్నారు. కనీస సౌకర్యాలు లేని మారుమూల ప్రాంతాల్లో జీసీసీ ఉద్యోగులు పనిచేస్తున్నారని అన్నారు.  అయితే గత కొన్నేళ్లుగా పరిస్థితి మెరుగుపడిందని, కార్పొరేషన్లో 600కు పైగా ఖాళీలతో సిబ్బంది కొరత ఉన్న విషయం తెలిసిందే నని , దశలవారీగా వీటిని భర్తీ చేయనున్నామని తెలిపారు. ఈ విషయాన్ని ముఖ్యమంత్రి వైఎస్ జగన్మోహన్  రెడ్డి   దృష్టికి తీసుకెళ్లానని, గిరిజనుల అభ్యున్నతికి ఆయన కట్టుబడి ఉన్నారని రాజన్న దొర తెలిపారు. దేశంలోని వివిధ ప్రాంతాల్లో బాగా ప్రాచుర్యం పొందిన జీసీసీ తేనె, కాఫీ వంటి ఉత్పత్తుల ఆన్లైన్ అమ్మకాలను ప్రోత్సహించాలని అధికారులకు పిలుపునిచ్చారు. 

    పాడేరు ఎమ్మెల్యే కె.భాగ్యలక్ష్మి లేవనెత్తిన సమస్యలను ప్రస్తావిస్తూ జిసిసి ఉత్పత్తులకు దేశవ్యాప్తంగా ప్రాచుర్యం కల్పించడానికి పర్యాటక ప్రదేశాల్లో జిసిసి అవుట్ లెట్లను ప్రారంభిస్తామని రాజన్న దొర తెలిపారు. దూనూరులో కాఫీ ప్రాసెసింగ్ యూనిట్ ఏర్పాటు ఆవశ్యకతను జీసీసీ చైర్ పర్సన్ శోభా స్వాతిరాణి మంత్రి దృష్టికి తీసుకెళ్లారు. ప్రాసెసింగ్ ప్లాంట్ లేకపోవడంతో కాఫీ గింజలను ప్రాసెసింగ్ కోసం బెంగళూరుకు పంపుతున్నామని తెలిపారు.  కార్పొరేషన్ లోని కోల్డ్ స్టోరేజీల ఏర్పాటు, డీఆర్ డిపోల ఆధునీకరణకు నిధులు మంజూరు చేయాలని కోరారు. గిరిజన ప్రాంతాల్లో వారాంతపు దుకాణాల్లో జీసీసీ స్టాల్స్ తెరవవచ్చని భాగ్యలక్ష్మి సూచించారు. చింతపండు అమ్మకాలను పెంచడానికి నాణ్యత ప్రమాణాలు పెంచే పద్దతి సహాయపడుతుందని ఆమె సూచించారు. 

    అరకు పార్లమెంటు సభ్యురాలు గొడ్డేటి మాధవి, జిల్లా పరిషత్ చైర్ పర్సన్ జల్లిపల్లి సుభద్ర, ఎపిట్రిసి చైర్మన్ ఎస్ బుల్లిబాబు, పాలకొండ ఎమ్మెల్యే వి.కళావతి మాట్లాడారు. అంతకు ముందు జీసీసీ వైస్ చైర్మన్, ఎండీ జి.సురేష్ కుమార్ కార్పొరేషన్ కార్యకలాపాలపై నివేదిక సమర్పించారు.  హ్యాండ్ వాష్, డిష్ వాష్, హెర్బల్ హెయిర్ ఆయిల్, గ్లిజరిన్ సబ్బులు వంటి కొత్తగా అభివృద్ధి చేసిన జిసిసి ఉత్పత్తులను మంత్రి ప్రారంభించారు.